vedtektsforslag

Styrets forslag til nye vedtekter

1. Memoar er ein ideell, frivillig organisasjon for utøvarar av munnleg historie (oral history). Det er ein demokratisk breiddeorganisasjon  med ei kjerne av profesjonelle medarbeidarar. Organisasjonen nyttar vedlagte logo, og mottoet «Alle har ei forteljing å dele».

2. Memoar sitt formål er å bygge levande kulturminne gjennom å samle,  dokumentere, dele, bevare og formidle ytringar om levd liv, livserfaringar og refleksjonar rundt opplevd historie

3. Memoar skal arbeide for:

   1. Kulturpolitisk anerkjenning av munnleg historie som bevaringsverdig kulturarv og at minst ein offentleg finansiert arkiv- eller biblioteksinstitusjon skal påleggast ansvar for langtidsarkivering av munnleg historie. 

   2. Etablering av eit kompetansesenter for munnleg historie og oppstart av ei permanent norsk livshistorieinnsamling.

   3. Bygge ut Memoar 

      1. som breiddeorganisasjon gjennom å rekruttere og aktivere medlemmer og å organisere samarbeid om munnleg historie med andre historielag, øvrig frivillig kulturvern,  arkiv-bibliotek- og museumsverksemder.

      2. som kompetanseorganisasjon gjennom å utvikle ei profesjonell kjerne med eit internasjonalt fagleg nettverk, og gjennom å formidle kompetanse gjennom kurs, trening, prosjektinitiativ, erfaringsdeling og fagleg diskurs

   4. Bygge opp samlingar av dokumenterte og indekserte intervjuopptak med personar som har opplevd og tatt del i historiske, kulturelle, sosiale og miljømessige endringsprosessar i samtid og nær fortid (“manns- og kvinneminne”)

   5. Gjere mest mogleg av desse samlingane tilgjengelege for flest mogleg interesserte gjennom å vidareutvikle nettsida Memoar.no til eit medium for deling av munnleg historie. 

   6. Formidle munnleg historie gjennom publikumsarrangement, publikasjonar, utstillingar og kunstnarisk vidareforedling, og arbeide for større akademisk interesse for og forsking innan munnleg historie. 

   7. Drifte og vidareutvikle ein infrastruktur for munnleg historie som skal bestå av

      1. eit sett av malar for dokumentasjon av samtykke til opptak, arkivering, bruk og vidareforedling av munnleg kjeldemateriale 

      2. verktøy for opptak, mellomlagring, redigering, dokumentasjon, indeksering, arkivering/avlevering og publisering av intervjuopptak 

      3. eit audiovisuelt arbeidsarkiv og ein eller fleire avtalar om langtidsarkivering med offentleg finansiert arkivinstitusjon. 

      4. eit publiseringsmedium for deling av munnleg historie (Memoar.no)

      5. eit medium for diskurs og fagutvikling av munnleg historie i Skandinavia (Memoar.blog)

      6. ein årleg konferanse for erfaringsdeling og fagleg diskurs om munnleg historie på skandinaviske språk. ((Memoarkonferansen)

4. Medlemskap:

   1. Alle som interesserar seg for immateriell kulturarv generelt og munnleg historie særskilt, er velkomne som medlemmer i Memoar. Medlemskontingenten for personleg medlemskap blir bestemt på årsmøte, og gir rett til deltaking med stemmerett på årsmøte, rett til rabatt på kurs og arrangement, rett til informasjon om nye prosjektinitiativ og rett til deltaking på erfaringsutvekslingar og fagleg diskurs. 

   2. Soge/historielag og andre frivillige kulturvernorganisasjonar som arbeider med eller interesserar seg for immateriell kulturarv generelt og munnleg historie særskilt, er velkomne som organisasjonsmedlemmer. Kontingenten for organisasjonsmedlemskap blir bestemt på årsmøte, og gir dei same rettane som personleg medlemskap for ein representant om gongen. Organisasjonsmedlemmer skal ha prioritet når Memoar organiserar samarbeidsprosjekt. 

   3. Memoar er medlem av Kulturvernforbundet, Landslaget for lokalhistorie, Studieforbundet kultur og tradisjon, Arkivforbundet og International Oral History Association. 

5. Årsmøtet er høgaste myndighet i Memoar. Alle medlemmer (personlege og organisasjonsmedlemmer) som har betalt kontingent har rett til å sende inn forslag om vedtak eller styrekandidatar og til å møte fysisk eller digitalt på årsmøtet med ei stemme kvar. Årsmøtet skal haldast i vårhalvåret kvart år. Det skal kallast inn med minst 14 dagars frist, og innkallingane skal gå til alle medlemmer gjennom epost, nettside og sosiale media der Memoar har ein profil. Årsmøtet skal gjere vedtak om:

   1. Årsmelding om arbeidet sidan sist årsmøte

   2. Rekneskap

   3. Arbeidsplan og budsjett

   4. Innkomne forslag

   5. Val av styre, styreleiar og revisor. 

   6. To av deltakarane på årsmøtet skal veljast til å gjå gjennom og stadfeste at protokollen er rett ved å signere han saman med protokollskrivaren.

6. Styret: Leiinga av Memoar skal utførast av eit styre på tre til sju personar.

   1. Styret skal veljast på årsmøtet. Kvart styremedlem skal veljast for to år, men slik at omlag halve styret er på val kvart år. 

   2. Styreleiar skal veljast på årsmøtet kvart år.

   3. Styret peikar ut rekneskapsførar for kvart år. Styreleiar skal få avstemt rekneskap kvar månad, og styret skal få rekneskapsrapport kvart kvartal.

   4. Styret peikar ut redaktør av organisasjonen sine media. 

   5. Dersom det er behov for ein dagleg leiar ved sida av styreleiar er det også styret som peikar ut denne. 

   6. Styret er vedtaksført når to tredelar av styret er til stade.

   7. Alle styrereferat skal signerast  av alle styremedlemmene som var til stade.

7. Konfliktar: Dersom nokon nyttar sitt medlemskap til hatefulle, diskriminerande, hånande eller trugande ytringar, skal ho eller han melde seg ut eller bli ekskludert frå Memoar av styret, årsmøtet eller ekstraordinært årsmøte

8. Dersom det oppstår ein heilt spesiell situasjon som 20% av medlemmene eller 1/3 av styret vil at heile organisasjonen skal ta stilling til, må styret kalle inn til ekstraordinært årsmøte. Eit slikt møte skal berre drøfte og gjere vedtak i den saka som det har blitt kalla inn for å handsame.

9. Oppløysing av organisasjonen

   1. Dersom to tredeler av dei som har stemmerett på eit årsmøte eller eit ekstraordinært årsmøte bestemmer det, skal Memoar oppløysast.

   2. Intellektuell og / eller økonomisk eigedom som Memoar måtte ha, skal i tilfelle oppløysing overførast til ein institusjon eller organisasjon som vil vidareføre formålet. Dersom to tredeler av dei som har stemmerett på det årsmøtet eller ekstraordinære årsmøtet som måtte vedta oppløysing gjer eit vedtak om ei slik overføring av eigedom, gjeld det. Er det ikkje to tredels fleirtal, skal intellektuell og økonomisk eigedom overførast til Landslaget for lokalhistorie.

10. Endring av desse vedtektene kan berre gjerast av eit lovleg innkalt årsmøte. Endringar kan gjerast med alminneleg fleirtal, bortsett frå eventuelt vedtak om oppløysing, som krevjer to tredels fleirtal.